Espasyo

Sa tuwing tinitingnan

ang mga kamay, hindi

maiwasang pansinin

ang puwang sa pagitan

ng mga daliri.

Hindi lang iilang beses

tinanong kung bakit may ganito,

Bakit may espasyo?

Naisip ko tuloy ang tao.

Kahit anong lapit ng loob,

kahit ibahagi ang sugat

na kubkob, mga damdaming

marubdob, kahit ilang

beses makipaglapit---

may maglalayo paring pilit.

Parang tayo.

Kahit nais kong kumapit

sa iyo, prinsipyo nati'y nagtatalo.

Kahit may dahilan

ang paglalapit,

gayundin karami

ang dahilan ng paghihiwalay---

ito ang sumusugat sa

aking malay.

Kaya sa tuwing tinitingnan

ang mga kamay,

hindi maiwasang

pansinin, sisihin,

ang espasyo sa pagitan

natin.

Noong Enenro 30 ko ito ginawa pero, ngayon ko lang nai-post dito. May mga kailangan pang i-edit. Kailangan pang ayusin ang reasoning sa tula. Pati ang paghahalintulad.

Salamat, PinoyPoets. Asahan ninyong magbibigay ako ng edited na kopya nito.